ԻՐԱՆԱԿԱՆ ԼՈՒՍԱՐՁԱԿ :

Կայացաւ հայ ամբաստանեալ Նժդեհ Նազարեանի առաջին դատական նիստը

Օրերս Թեհրանի պատժական դատարանում տեղի ունեցաւ երիտասարդ Նժդեհ Նազարեանի դատական գործին վերահասութեան առաջին նիստը:
Մանրասմասնութիւնների վերաբերեալ հեռախօսազրոյց ունեցանք բանտարկեալի փաստաբան Յովիկ Բեհբուի հետ: Նա դէպքի մանրամասնութիւնները այսպէս ներկայացրեց. «Իրանական 1388 թւականի մեհր ամսի 16-ից Նժդեհը բանտարկւած է Քամբիզ Նուրի անունով մի անձի սպանելու ամբաստանութեամբ, որը պատահել է փողոցում տեղի ունեցած բախման ընթացքում:
Դէպքը հետեւեալ ձեւով է ընթացել՝ հանգուցեալ Քամբիզ Նուրին իր տղայի՝ Ալիի հետ մոտոցիկլետով անցնելիս են լինում Թեհրանի Զարդոշտ փողոցով եւ երկու հոգու հետ լեզւակռւի են բռնւում, որոնցից է Նժդեհ Նազարեանը եւ միւսը՝ մի պարսիկ տղայ: Այս ընթացքում լեզւակռիւը վերածւում է քաշքշուկի եւ դէպքի վայր են հասնում Նժդեհի ընկերներից երկուսը, իհարկէ՝ ոչ-հայ. դժբախտաբար, բոլոր չորս հոգին էլ օգտագործած են եղել ոգելից խմիչք: Երբ քաշքշուկը սաստկանում է, այդ ընթացքում հանգուցեալը վիրաւորւում է, որից յետոյ մոտոցիկլետով իր տղայի հետ հեռանում է այդ վայրից եւ Հաֆէզ պողոտայում մահանում ու ընկնում է մոտոցիկլետի վրայից: Ոստիկանութեան միջամտութեամբ՝ ձերբակալւում են Նժդեհը եւ յետոյ էլ՝ նրա երեք ընկերները: Նժդեհը ձերբակալւելով՝ յայտնել է, որ երբ սկսւել է քաշքշուկը, մոտոցիկլետաւորը (հանգուցեալը) կոտրել է իր մոտոցիկլետի դիմացի վահանակն ու յարձակւել է Նժդեհի վրայ: Նժդեհն էլ իր ընկերոջ դանակով միայն մէկ հարւած է հասցրել հանգուցեալի ձեռքին: Դէպքից յետոյ՝ ոստիկանութիւնը չորսին էլ ձերբակալել է որպէս սպանութեան հարցով մասնակցող, իսկ Նժդեհին՝ որպէս գործակատար, եւ բոլորին նաեւ ամբաստանել են խմած լինելու գծով:
Դատական առաջին նիստը կայացաւ թւականիս մայիսի 18-ին՝ նահանգի պատժական դատարանի 71-րդ մասնաճիւղում, դատաւոր Ազիզ Մոհամմադիի նախագահութեամբ, հինգ դատաւորների, դատախազի, հանգուցեալի ընտանիքի, փաստաբանի, ամբաստանեալի եւ Յովիկ Բեհբուի ներկայութեամբ:
Փաստաբան Բեհբուն ասաց. «Ես դատարանում բացատրեցի, որ ըստ դատա-բժշկական քննութեան՝ հանգուցեալի մարմնի վրայ երկու դաշոյնի տեղ կայ, մէկը ուսի վրայ, միւսը՝ վզի տակ, իսկ Նժդեհը ասել է, որ մէկ հարւած է հասցրել՝ միայն ձեռքին եւ ըստ դատա-բժշկական քննչական աշխատանքների՝ հանգուցեալը մահացել է վզի տակ հասցւած դաշոյնի հարւածից:
Ես դատարանին բացատրեցի նաեւ, որ եղել է երկու դանակ, որոնցից մէկը հանգուցեալի տղայի ձեռքում է եղել, միւսը՝ Նժդեհի, որով Ալին (մահացածի տղան) հարւածել ու վիրաւորել է միւսներին: Նշեցի նաեւ, որ Նժդեհը ինքնապաշտպանութեան համար է օգտւել դաշոյնից եւ հարբած վիճակում հաւասարակշռւած չի եղել, իսկ երրորդ պարագան հետեւեալն է, որ դանակի երկու հարւած է եղել եւ ես դատարանից ուզել եմ, որ գործը յետ ուղարկւի դատախազութիւն, որպէսզի պարզւի, թէ մահւան յանգած հարւածը ո՛վ է հասցրել:
Դատարանը սկսել է իր քննարկումները: Աւելացնեմ, որ հանգուցեալի փաստաբանը մահապատիժ է պահանջել կամ էլ մեծ գումար՝ արեան գնի ի դիմաց:
Յաջորդ դատական նիստի թւականը դեռ պարզ չէ»:

http://www.alikonline.com/newsviewpage.aspx?idl=31641